Diş niyə gecələr ağrıyır?

Ağrı niyə məhz gecə güclənir?

Uzanan kimi başa və üzə gələn qanın miqdarı artır. Sağlam dişdə bu hiss olunmur. Amma dişin içindəki sinir (pulpa) iltihablıdırsa, o, bərk divarlar arasında sıxılıb qalır: şişməyə yer yoxdur, təzyiq birbaşa sinirə düşür. Ona görə gündüz azca sızlayan diş gecə başınızı yastığa qoyanda zoqquldamağa başlayır.

İkinci səbəb sadədir. Gündüz iş, yol, söhbət insanın fikrini ağrıdan yayındırır. Gecə sakitlikdə bütün fikir ağrıda olur və o, daha güclü hiss olunur.

Gecə ağrısının ən çox rast gəlinən səbəbləri hansılardır?

• Dərin kariyes və sinirin iltihabı (pulpit). Ən çox rast gəlinən səbəbdir. Ağrı özbaşına başlayır, soyuqdan və ya istidən sonra uzun müddət keçmir, bəzən qulağa, gicgaha, çənəyə vurur.
• Dişin kökündə iltihab. Dişin üstünə basanda, dişləyəndə ağrıyır, sanki diş uzanıb. Bəzən diş ətində şiş, ağızda pis dad olur.
• Gecələr dişləri bərk sıxmaq və ya qıcamaq. Səhər dişlər və çənə əzələləri yorğun olur, ağrı bir dişdə yox, bir neçəsində hiss olunur.
• Diş əti iltihabı, o cümlədən yarımçıq çıxmış ağıl dişinin ətrafında. Diş əti şişir, qanayır, ağzı açmaq çətinləşə bilər.
• Haymor boşluğunun iltihabı (sinusit). Yuxarı arxa dişlərin bir neçəsi birdən sızlayır, başı aşağı əyəndə ağrı artır, burun tutulur. Bu halda səbəb heç dişdə olmaya bilər.

Səhərə qədər evdə nə etmək olar?

• Əvvəllər içdiyiniz və sizə uyğun olan ağrıkəsicini qutudakı təlimata uyğun dozada için. Dozanı öz bildiyiniz kimi artırmayın.
• Başınızı bir az hündür yastıqla qaldırın: dişə gələn təzyiq bir qədər azalır.
• Ağzınızı otaq temperaturunda su ilə yaxalayın. Dişlərin arasında yemək qalıbsa, diş ipi ilə ehtiyatla təmizləyin.
• Yanağın üstünə dəsmala bükülmüş buzu 10⁠–⁠15 dəqiqəlik qoya bilərsiniz.

Nə etmək olmaz: ağrıkəsici həbi dişin və ya diş ətinin üstünə qoymayın, selikli qişanı yandırır. Şişmiş yanağı isitməyin. Ağrını spirtli içki ilə susdurmağa çalışmayın.

Ağrıkəsici ağrını götürür, səbəbi yox. Səhər ağrı azalsa da, dişi göstərin.

Nə vaxt səhəri gözləmək olmaz?

Üz və ya boyun şişirsə, qızdırma varsa, udmaq və ya nəfəs almaq çətinləşibsə, ağız açılmırsa, səhəri gözləməyin: gecə də açıq olan klinikaya gedin və ya 103-ə zəng edin. Bu əlamətlər iltihabın yayıldığını göstərə bilər.

Ağrı özü keçdisə, yenə həkimə getmək lazımdırmı?

Bəli. Gecə ağrısının birdən kəsilməsi heç də həmişə yaxşı xəbər deyil. İltihablı sinir ölə bilər və diş bir müddət susar. İltihab isə kökə keçir və həftələr, bəzən aylar sonra şişlə qayıda bilər. Tez gəlsəniz, müalicə də adətən daha sadə olur.

Qəbulda nə edilir?

Əvvəlcə soruşulur: ağrı nə vaxt başlayıb, nədən artır, harada hiss olunur. Sonra dişə baxılır, lazım olsa, şəkil çəkilir: klinikada həm panoramik rentgen, həm də 3D tomoqrafiya var. Kariyesin nə qədər dərin olduğunu, kökdə iltihab olub-olmadığını şəkil göstərir.

Səbəb sinirdədirsə, çox vaxt kanal müalicəsi lazım olur. Kanalları əvvəllər müalicə olunmuş dişdə iltihab varsa, təkrar kanal müalicəsi edilir. Bu müalicə anesteziya ilə edilir, ağrı da çox vaxt elə ilk gəlişdə götürülür. Kariyes hələ sinirə çatmayıbsa, plomb bəs edə bilər. Nə lazımdır, neçə seans çəkəcək, neçəyə başa gələcək: hamısı müalicədən əvvəl deyilir.

Ağrının səbəbi sinusitdirsə, LOR həkiminə görünmək lazımdır.