Evdə dişləri necə ağartmaq olar?

Soda ilə dişləri ağartmaq olarmı?

Soda dişləri ağartmır, sadəcə səthi ləkəni sürtüb götürür. Bunu minanı da sürtərək edir. İlk günlər dişlər bir az açıq görünə bilər, amma tez-tez işlədəndə mina cızılır və nazikləşir.

Cızılmış səthə ləkə daha tez yapışır, dişlər həssaslaşır. Mina isə bərpa olunmur: itən mina geri gəlmir. Nazik minanın altından sarı dentin daha çox görünür, yəni nəticədə dişlər daha sarı görünə bilər.

Limon və sirkə dişləri ağardırmı?

Yox. Limon, sirkə, alma sirkəsi, çiyələk kimi turş şeylər minanı kimyəvi yolla yumşaldır və əridir. Buna eroziya deyilir. Limonu dişə sürtəndə və ya sodanı limonla qarışdıranda zərər daha da artır.

Eroziyanın ilk əlamətləri dişlərin soyuğa həssaslaşması, kənarlarının şəffaflaşması və saralmasıdır. Bu, ağartmanın tam əksidir.

Aktivləşdirilmiş kömür kömək edirmi?

Kömürlü pasta və tozların həm təhlükəsiz, həm də faydalı olduğuna dair yaxşı sübut yoxdur. Kömür sürtücüdür: sodaya oxşar, ləkəni minanı sürtərək götürür. Onun hissəcikləri diş ətinin kənarında və plombların kənarında qalıb boz iz qoya bilər. Çox kömürlü pastada flüor da olmur, dişi kariyesdən qorumur.

Kokos yağı ilə ağzı yaxalamaq, zerdəçal və banan qabığı kimi məsləhətlərin də dişləri ağartdığına dair sübut yoxdur.

Ağardan pasta nə edir?

Ağardan pasta səthdəki çay, qəhvə və siqaret ləkəsini bir qədər götürür. Dişin öz rəngini dəyişmir. Bəzilərində sürtücü hissəciklər çox olur, ona görə dişlər həssasdırsa və ya diş əti çəkilibsə, onu hər gün işlətməyin. Gündəlik pasta flüorlu olmalıdır. Ağardan pastadan sonra rəng dəyişmirsə, deməli, səbəb səthdə deyil: onu ancaq müayinədə dəqiq demək olar.

Ağardıcı zolaqlar və gellər təhlükəsizdirmi?

Zolaqlarda və ağardıcı gellərdə peroksid olur, dişin öz rəngini də elə o açır. Ona görə bunlara diqqətlə yanaşmaq lazımdır. Avropa İttifaqında sərbəst satılan məhsullarda peroksidin miqdarı çox aşağı həddə məhdudlaşdırılıb, daha güclüləri isə yalnız diş həkimi vasitəsilə verilir. İnternetdən alınan məhsullarda isə tərkibində nə qədər peroksid olduğu çox vaxt bəlli olmur, təlimatı da hər zaman düzgün tərcümə olunmur.

• Gel diş ətinə dəyib onu qıcıqlandıra və yandıra bilər.
• Kariyes və ya açıq diş boyunları varsa, gel həssas yerə düşür və ağrı verir.
• Zolaq dişlərin arasına və əyri dişlərə yaxşı çatmır, rəng ala-bula çıxa bilər.
• Plomb ağarmır: ağardılmış dişin yanında tünd görünə bilər.

Peroksidli məhsulları müayinədən sonra və yalnız diş həkiminin nəzarəti ilə işlədin. Evdə ağartmanın təhlükəsiz yolu da var: dişlərinizə görə fərdi kappa hazırlanır, ona həkimin verdiyi gel qoyulur və siz onu evdə taxırsınız.

Ləkələri nə götürür və qəbulda nə edilir?

Sarı görünən dişlərin çoxunda səbəb ləkə və diş daşıdır. Onları peşəkar təmizləmə götürür: diş daşı təmizlənməsi bütün ağız üçün 60⁠–⁠100 AZN-dir, çay, qəhvə və siqaret ləkələri üçün Air Flow ilə təmizləmə 100 AZN-dir. Çox vaxt təmizləmədən sonra ağartmaya ehtiyac qalmır.

Əvvəlcə dişlərə baxılır: ev üsulları bəzən problemi gizlədir. Rəng dəyişikliyi kariyesdən, köhnə plombdan və ya bir dişin içəridən tündləşməsindən ola bilər. Belə hallarda ağartma yox, müalicə lazımdır. Ağartma sizə uyğundursa, klinikada və ya evdə kappa ilə, hansı üsulun uyğun olduğu və qiyməti deyilir.

Ev üsullarından sonra dişlər sızlayırsa, diş əti yanıbsa və ya bir diş tək tündləşibsə, üsulu dayandırın və dişləri göstərin.